Kreml memurı Floridada ABD ve Rusiye vekilleriniñ körüşüvinden soñ Rusiyeniñ Ukrayinağa qarşı cenkini toqtatuv barışıq muzakerelerinde tez vaqıtta ilerilev olacağınıñ imkânlarını eksiltti.
Yuriy Uşakov, Rusiye prezidenti Vladimir Putinniñ tış siyaset yardımcısı, dekabrniñ 21-nde Moskvada Rusiye muzakerecisi Kirill Dmitriyev evge qaytıp, Putinge maruza berecek, dep bildirdi.
"Amerikalılar bu künleri Milât bayramını qayd ete. Az çalışacaqlar", – dedi o.
O, Ukrayina prezidenti Volodımır Zelenskıynıñ Washington üç taraflı muzakereler teklif etti beyanatını da izaatladı.
"Şimdilik bu teşebbüsni ciddiy şekilde kimse muzakere etmedi, ve, bilgenime köre, onıñ üzerinde çalışmaylar", – dedi Uşakov, ve Dmitriyev tek Amerika memurlarınen muzakere keçire, dep qoştı.
Floridadaki muzakereler intensiv diplomatik faaliyet aftasından soñ keçe, ABD vekilleri Avropa ve Ukrayina memurlarınen körüşken edi.
Noyabr ayında Trump Kyivni 28 maddelik teklifini qabul etsin dep basqı yapıp başladı, tenqitçilerniñ fikirince, bu teklif Rusiyeniñ menfaatlarına yaramaqta. Ukrayina ve Avropa tarafdarları topraq, Kyiv içün telükesizlik kefaletleri ve diger meselelerde memleketniñ menfaatlarını qorumaq içün öz tüzetüvlerini teklif etti. Aytılğanına köre, plan 20 maddeden ibaret ve Kyivniñ menfaatlarını köz ögüne ala.
"Eminim, avropalılar ve ukrayinalılar kirsetken ya da kirsetmege tırışqan teklifler, şübhesiz, vesiqanı eyileştirmez ve uzun müddetli barışıqqa irişüv imkânını arttırmaz", – dedi Uşakov.
Kreml spikeri Dmitriy Peskov dekabrniñ 21-nde Putin ve ABD prezidenti Donald Trumpnıñ telefon subeti planlaştırılmay, "amma kerek olsa, teşkil etile bile", dep bildirdi.
O, Putin dekabrniñ 21-22-nde Sankt-Peterburgda diplomatik körüşüvler vaqtında Aleksandr Lukaşenkonen körüşecek, dep bildirdi.
Peskov tedbir vaqtında Putin Ermenistan, Azerbaycan, Qırğızistan, Turkmenistan ve Özbekistan liderlerinen körüşecek, dep qayd etti.
Dekabrniñ 20-nde Floridada keçirilgen muzakerelerniñ birinci kününden soñ Dmitriyev Rusiye ve ABD konstruktiv subet kerçekleştire, dep bildirdi. Beyaz saray bu körüşüvni daa izaatlamadı.
